തെറിവിളി കമന്റുകളും സ്പാം കമന്റുകളും ഡിലീറ്റ്‌ ചെയ്യപ്പെടും...

Tuesday, March 30, 2010

229.ഫാദര്‍ ബോബി ജോസ്..



ഫാദര്‍ ബോബി ജോസ്..

കാല്‍പ്പനികതയും സമകലീകതയും ആത്മീകതയുമായി ഒത്തുപോകില്ലെന്നത് ഒട്ടേറെ പുരോഹിതര്‍ കരുതുന്ന ഒന്നാണ്. പൗരോഹിത്യത്തിന്റെ ഇടനാഴികളില്‍ പുറം ലോകത്തെ കാണാതെ പോകുന്നതാണ് ഇതിന്റെ കാതലായ പ്രശ്നം. ഇതിനു വിപരീതമായി ചിന്തിക്കുന്നവരും പ്രവര്‍ത്തിക്കുന്നവരുമായ ചില പുരോഹിതര്‍ ഉണ്ടാകാറുണ്ട്. അതുകൊണ്ട് തന്നെ ഈ ഗണത്തില്‍ പെട്ട പുരോഹിതര്‍ പൊതുജനങ്ങള്‍ക്കു വളരെ പ്രിയങ്കരായിരിക്കും. ഫിലിപ്പോസ് മാര്‍ ക്രിസ്റ്റോസ്റ്റം മാര്‍ തോമ സീനിയര്‍ മേത്രോപോലിത്തയെ പോലെ ഈ ഗണത്തില്‍ പെട്ട പുരോഹിതരില്‍ പെട്ട ഒരാളാണ് ആദരണീയനായ ഫാദര്‍ ബോബി ജോസ്. കത്തോലിക്കാ സഭയിലെ കപ്പൂച്ചിന്‍ സന്ന്യാസി സമൂഹത്തിലെ ഈ പുരോഹിതനും ഏറെ ജനപ്രിയനും സഹൃദയനുമായ ഒരാളാണ്. ഒരുപക്ഷെ ഈ പോസ്റ്റ്‌ വായനക്കാരുടെ പ്രതികരണം എങ്ങനെ ആകും എന്ന് ഒരിക്കല്‍പോലും ചിന്തിക്കാതെ എഴുതുന്നതാണ്.. അതേപോലെ ഈ ബ്ലോഗില്‍ ഞാന്‍ ഇതുവരെ പ്രസിദ്ധീകരിച്ച പോസ്റ്റുകളില്‍ ഏറ്റവും പ്രീയപ്പെട്ട പോസ്റ്റുകളില്‍ ഒന്നുമാണ്.

സ്വന്തം മതത്തിന്റെയും സഭയുടെയും മാത്രം മതില്‍ക്കെട്ടുകളില്‍ ഒതുങ്ങിനിന്നു ചിന്തിക്കുന്ന മിക്കപുരോഹിതരും അതുകൊണ്ട് തന്നെ അതാതു സഭയ്ക്കുള്ളില്‍ ഒതുങ്ങി മറ്റുള്ളവര്‍ക്ക് അനഭിമതനും അപ്രിയനും ആകാറുണ്ട്. അതേപോലെ മറ്റുമതത്തെയോ സഭയെക്കുറിച്ചോ ഒന്നും അറിയാത്ത കേവലം കൂപമണ്ഡൂകം മാത്രമായി പോകാറുണ്ട്. സ്വന്തം പ്രസംഗങ്ങളില്‍ അതുകൊണ്ട് തന്നെ മറ്റുമതങ്ങളെ ഇകഴ്ത്തിയും സ്വന്തം സഭയും മതത്തെയും പറ്റി അപകടരമായ രീതിയില്‍ അഗ്രസിവ് ആയും വാരി വിളമ്പി പ്രസംഗിക്കാറുണ്ട്. ഇവിടെയാണ്‌ ഫാദര്‍. ബോബി ജോസ് വെത്യസ്തന്‍ ആവുന്നത്. തന്റെ പ്രസംഗങ്ങളില്‍ ഉദാഹരങ്ങളായി മിക്കപ്പോഴും മറ്റു മതങ്ങളിലെ കാര്യവും ഇദ്ദേഹം ഉദ്ധരിക്കാറുണ്ട്. അതേപോലെ മറ്റുമതങ്ങളെ അദ്ദേഹം ബഹുമാനിക്കുന്നതായി സ്പഷ്ടമാക്കുന്ന തരത്തിലുള്ള സംസാരമാണ് ഇദ്ധെഹത്തിന്റെത്. തന്റേതായ രീതിയില്‍ നടത്തുന്ന ഒരു ഗുരുചരണം പ്രോഗ്രാമിന് നല്ല പ്രേക്ഷകരുമുണ്ട്. ബ്ലോഗിലും ഇന്റെര്‍നെറ്റിലും വളരെ മുമ്പേ തന്നെ പലരും ഇദ്ദേഹത്തെ പറ്റി എഴുതിയിട്ടുമുണ്ട്. കൂതറ തിരുമേനിയുടെ ചില സ്വകാര്യ നിമിഷങ്ങളില്‍ ഇദ്ദേഹത്തിന്റെ പ്രസംഗം കേള്‍ക്കാറുള്ളതുകൊണ്ടാണ് ഈ പോസ്റ്റ്‌ ഇടുന്നത്. തന്റെ സൌമ്യവും സംയമാനപരവുമായ പ്രസംഗങ്ങളില്‍ നമ്മെ മറ്റൊരു ലോകത്തേക്ക് കൊണ്ടുപോകാന്‍ ഇദ്ദേഹത്തിനു കഴിയുന്നു.

1520 ല്‍ രൂപമെടുത്ത കപ്പൂച്ചിന്‍ സന്യാസസമൂഹം വളരെ മുമ്പേതന്നെ ഭാരതത്തില്‍ തങ്ങളുടെ വരവറിയിരിച്ചിരുന്നു.1632 ഇല്‍ ഫ്രഞ്ച് കച്ചവടക്കാരുടെ ഒപ്പം എത്തിയ കാപ്പൂചിന്‍ പുരോഹിതരാണ് ഇന്ത്യയില്‍ ആദ്യം എത്തിയതെന്ന് കരുതുന്നു. പിന്നീട് കമ്പനി പൂട്ടിയതോടെ മടങ്ങിയ ഇവര്‍ 1639 ല്‍ ഫാദര്‍ സീനോയുടെ നേതൃത്തത്തില്‍ ഗോവയില്‍ എത്തി. പിന്നീട് ഉത്തര ഭാരതത്തിലും മറ്റു ഇതര പ്രാന്തങ്ങളിലും പ്രവര്‍ത്തിച്ച കാപ്പൂചിന്‍ സന്ന്യാസികള്‍ പിന്നീട് കേരളത്തിലും എത്തി. ഇന്ത്യയില്‍ കാപ്പൂചിനുകളുടെ വളര്‍ച്ചയ്ക്ക് കാരണക്കാരനായ ഫാദര്‍ ക്ലെമെന്റ് തന്നെയാണ് കേരളത്തിലും ഇതിന്റെ വളര്‍ച്ചയ്ക്കും തുടക്കത്തിനും കാരണക്കാരനായത്. ഫാദര്‍ ജോണ്‍ ബെര്‍ക്മാന്‍സ് ആദ്യത്തെ പ്രോവിഷണല്‍ മിനിസ്ടര്‍ ആകുകയും ചെയ്തു.
ഈ സമൂഹത്തിലെ പുതുതലമുറയിലെ ഫാദര്‍ ബോബി ജോസ് ആകട്ടെ തന്റെ പ്രവര്‍ത്തനങ്ങളിലും പ്രസംഗ പരമ്പരകളിലും കൂടി ജനപ്രിയനായി തീര്‍ന്നു. ഒരുപക്ഷെ ചിലരെങ്കിലും വിര്‍ജിന്‍ മേരിയുടെ പ്രസക്തിയും അല്ലെങ്കില്‍ യേശു ക്രിസ്തുവിന്റെ ജീവിതത്തില്‍ വിര്‍ജിന്‍ മേരിയ്ക്കുള്ള (കന്യാ മറിയം) സ്ഥാനവും സംശയത്തോടെ നോക്കാറുണ്ട്. മേരി അപ്രസക്തയല്ലേ എന്നുപോലും ചിന്തിക്കുന്നവരുണ്ടാകാം. എന്നാല്‍ എല്ലാ സ്ത്രീകളിലും മേരിയുണ്ട് അതുകൊണ്ടാണ് കര്‍ത്താവ് പതിതകള്‍ക്കും പാപിനികള്‍ക്കും മാപ്പ് നല്‍കുന്നതെന്ന് പഠിപ്പിക്കുന്ന ഒരു ശൈലി ഈ സംശയാലുക്കളെ ഒരുപക്ഷെ മാറ്റി നിര്‍ത്തി ചിന്തിപ്പിക്കാന്‍ പ്രേരിപ്പിക്കും.

ബൈബിളിനെ മറ്റൊരു കണ്ണിലൂടെ - പുരുഷ മേധാവിതത്തിലുള്ള പഴയ നിയമവും സ്ത്രീകള്‍ക്ക് അല്പം കൂടി പ്രാധിനിത്യവും ഗരിമയും കൊടുക്കുന്ന പുതിയനിയമവും ഫാദര്‍ ബോബി ജോസിന്റെ വാക്കുകളിലൂടെ കേള്‍ക്കുമ്പോള്‍ അമൃതവാണിയായി മാറുന്നു.. സമകാലീന സാഹിത്യ,രാഷ്ട്രീയ രംഗങ്ങളും സിനിമ രംഗങ്ങളും മാത്രമല്ല കല്പ്പനികതയെയും അറിയുന്ന പരന്ന വായനയുടെ ഉടമയായാതുകൊണ്ടാവം ഒരുപക്ഷെ ഫാദര്‍ ബോബി ജോസിനു ഇത് കഴിയുന്നത്‌. പ്രതിപക്ഷബഹുമാനത്തോടെയുള്ള അദ്ദേഹത്തിന്റെ വാക്കുകള്‍ തന്നെ ആദരവ് അര്‍ഹിക്കുന്നതാണ്.. സഞ്ചാരിയുടെ ദൈവം , ഹൃദയ വയല്‍ , കേളി നിലത്തെഴുത്ത് തുടങ്ങിയ പുസ്തകങ്ങളുടെ കര്‍ത്താവാണ് അദ്ദേഹം..

ഈ പോസ്റ്റില്‍ എന്തെന്തിലും തെറ്റുകള്‍ ഉണ്ടെങ്കില്‍ ക്ഷമിക്കുക.. ഈ പോസ്റ്റ്‌ തയ്യാറാക്കാന്‍ സഹായിച്ച ബ്ലോഗര്‍മാരായ ജോണ്‍ ചാക്കോ പൂങ്കാവ് . പ്രവാചകന്‍ എന്നിവരോട് കൂതറ തിരുമേനിയുടെ അകൈതവമായ നന്ദി രേഖപ്പെടുത്തി കൊള്ളുന്നു.

Friday, March 26, 2010

228.വീണ്ടുമൊരു ആഘോഷം

തലക്കെട്ട്‌ കണ്ടു ആഘോഷിക്കാന്‍ എത്തിയവര്‍ ക്ഷമിക്കുക. കേരളത്തിലെ അപൂര്‍വ്വം ചില മനുഷ്യ സ്നേഹികളെ കണ്ണീരിലാഴ്ത്തി മറ്റൊരു ബസ്സപകടം കൂടി കഴിഞ്ഞുപോയി. അപൂര്‍വ്വം ചിലരെന്നു പറഞ്ഞതില്‍ പരിഭവിക്കേണ്ട.. മറ്റുള്ളവര്‍ക്ക് ഇതൊരു വാര്‍ത്തയോ ആഘോഷമോ മറ്റൊരു അപകടമോ മാത്രം. ഇതിനിടയില്‍ ചില തന്തയ്ക്കു പിറക്കാത്തവര്‍ക്ക് മൊബൈല്‍ ഫോണിന്റെ സ്റ്റില്‍, വീഡിയോ കാമറകളുടെ പ്രവര്‍ത്തന മികവ് പരിശോധിക്കാനൊരു അവസരവും.. മുമ്പൊരിക്കല്‍ അതിനെപ്പറ്റി പോസ്റ്റ്‌ ഇട്ടിരുന്നതിനാല്‍ വീണ്ടും ആവര്‍ത്തനവിരസത ഉണ്ടാക്കുന്നില്ല.. പറഞ്ഞാലോ അറിഞ്ഞാലോ കൊണ്ടാലോ കണ്ടാലോ പഠിക്കാത്തവരെ എഴുതി പഠിപ്പിക്കാന്‍ ഞാനാര് കുഞ്ഞന്‍ നമ്പ്യാരോ..?

ഇത്തരം അപകടങ്ങള്‍ എങ്ങനെ ഒഴിവാക്കാം എന്നാണു ചിന്തിക്കേണ്ടത്. സ്വാഭാവികമായും റോഡ്‌ വികസനത്തിനോ അപകടം ഒഴിവാക്കാനുള്ള മാര്‍ഗ്ഗങ്ങള്‍ നടത്താനോ കാശില്ലാത്ത സര്‍ക്കാരില്‍ നിന്നും ഒന്നും പ്രതീക്ഷിച്ചിട്ടു കാര്യമില്ല.. വിദേശത്തും സ്വദേശത്തും അധ്വാനിച്ചുണ്ടാക്കുന്ന കോടികള്‍ കൊട്ടാരം കെട്ടിപ്പൊക്കാന്‍ മാത്രം ചിലവഴിക്കുന്ന പ്രജകള്‍ താമസിക്കുന്ന കേരളത്തിലെ ജനങ്ങളും വല്ലതും ചെയ്യുമെന്ന് കരുതേണ്ട. എന്നാല്‍ ജീര്‍ണ്ണിച്ചതും ജീര്‍ണ്ണിച്ചു കൊണ്ടിരിക്കുന്നതുമായ ഉപഭോക്തൃ സംസ്കാരത്തിന്റെ ഉടമകളായ കേരളമക്കളെ വീണ്ടും തങ്ങളുടെ വിഭവങ്ങള്‍ കൊണ്ട് മൂടിപ്പുതപ്പിക്കുന്ന കമ്പനികളുടെ കൈയില്‍ നിന്ന് പണം കണ്ടെത്തി വേണമെങ്കില്‍ ഒരുപരിധിവരെ ഇതിനു പരിഹാരം ചെയ്യാമെന്ന് കരുതുന്നു..

ദൂരം കാണിക്കാന്‍ വെയ്ക്കുന്ന ബോര്‍ഡുകളില്‍ പരസ്യം സ്ഥാപിക്കാന്‍ നടക്കുന്നവന്റെ നെഞ്ചത്ത്‌ പൊങ്കാലയിട്ടു കാശുമുടക്കി ദൂരം, റോഡിന്റെ തിട്ട , വരാന്‍ പോകുന്ന അപകടങ്ങള്‍ വളവുകള്‍ മുതലായവ കാണിക്കുന്ന ബോര്‍ഡുകള്‍ വെയ്ക്കാന്‍ കമ്പനികളില്‍ നിന്ന് ക്യാന്‍വാസ് ചെയ്തു കാര്യം നടത്തുക.. ഒരു സൈഡില്‍ അവര്‍ പരസ്യം കാണിക്കട്ടെ മറു വശത്ത്‌ അവരുടെ പരസ്യവും ആകാമല്ലോ.. കാക്കയുടെ വിശപ്പും പശുവിന്റെ കടിയും മാറുമെങ്കില്‍ അതാവട്ടെ..!

അതേപോലെ ഗര്‍ത്തങ്ങളുടെ മുകളില്‍ വേലിക്കല്ല്, കൈവരി തുടങ്ങിയ സ്ഥാപിക്കാനും ഇതേ മാര്‍ഗ്ഗം തന്നെ ഉപയോഗിക്കാം. പരസ്യം കാണിക്കാന്‍ കമ്പനികള്‍ മടിക്കുമെന്നു കരുതേണ്ട.. എന്നാല്‍ അമിതാബ് ബച്ചന്റെ കാര്യത്തില്‍ കേന്ദ്രത്തില്‍തീരുമാനം എടുത്തപോലെ പോ.ബ്യൂറോ.ക്കാര്‍ ഇതിനെ നേരിടാതെ ഇരുന്നാല്‍ മതിയാരുന്നു.. അടുത്ത കടമ്പ മറ്റാവശ്യത്തിനു പ്രത്യേകിച്ചും ഫയര്‍ ഫോഴ്സ് , പോലെയുള്ള സേനകളെ സുസജ്ജം ആക്കുക എന്നതാണ്.. ഇപ്പോള്‍ തന്നെ ആവശ്യത്തിലേറെ സാമ്പത്തിക ബുദ്ധിമുട്ട് അനുഭവിക്കുന്ന സേനയ്ക്ക് ഫണ്ട് അനുവദിക്കുകയാണ് ഏറ്റവും അത്യാവശ്യം..

സ്വാഭാവികമായും ഇല്ലായ്മ പാടുന്ന സര്‍ക്കാര്‍ എങ്ങനെ പണം കണ്ടെത്തും എന്നതാണ് അടുത്ത വിഷയം. ഇന്ത്യയില്‍ ഏറ്റവും കൂടുതല്‍ മദ്യം വില്‍ക്കുന്ന കേരളത്തില്‍ ഓരോ കുപ്പി മദ്യത്തിലും ഒരു രൂപയെങ്കിലും സര്‍ചാര്‍ജ് ഏര്‍പ്പെടുത്തിയാല്‍ ഈ പണം കണ്ടെത്താന്‍ ബുദ്ധിമുട്ടില്ല.. കുടിയന്മാരുടെ അല്പം പണം ഈ കാര്യത്തിലെങ്കിലും ഉപയോഗിക്കാം. ഇത് ഭരണഘടനാ വിരുദ്ധം ഒന്നുമല്ല.. തെലുങ്കന്റെ നാട്ടില്‍ ഇതൊക്കെ പരീക്ഷിച്ചു വിജയിച്ച കാര്യമാണ്. വേണമെങ്കില്‍ സിഗരട്ടിലും ഈ സര്‍ചാര്‍ജ് ഏര്‍പ്പെടുത്താം. അങ്ങനെ കിട്ടുന്ന പണം റോഡിന്റെ ഇത്തരം പ്രശ്നങ്ങള്‍ കൈകാര്യം ചെയ്യാനും ഫയര്‍ഫോഴ്സ് പോലെയുള്ള സേനകളുടെ നവീകരണത്തിനും ഉപയോഗിക്കാം.. ഒപ്പം ടെറരിട്ടരി ആര്‍മി പോലെ അവശ്യ ഘട്ടങ്ങളില്‍ അപകടങ്ങളില്‍ പെടുന്നവരെ രക്ഷിക്കാനുള്ള ഓരോ പരിശീലനം നേടിയ ആളുകളുടെ ഗ്രൂപ്പുകള്‍ ഉണ്ടാക്കുന്നതും നല്ലതായിരിക്കും.. ഈ ഗ്രൂപ്പുകള്‍ സര്‍ക്കാര്‍ ഉണ്ടാക്കണം എന്നില്ല രാഷ്ട്രീയ പാര്‍ട്ടികള്‍ , മതസ്ഥാപാനങ്ങള്‍ തുടങ്ങി ആരും ചെയ്‌താല്‍ മതിയാവും..

അടുത്ത ഏറ്റവും കൂതറ പരിപാടിയാണ് അല്പം താമസിക്കുന്ന രക്ഷാപ്രവര്‍ത്തകരുടെ നെഞ്ചത്ത്‌ കുതിര കയറുന്ന പ്രവണത.. കേരളത്തിലെ റോഡിന്റെ അവസ്ഥ അറിയാവുന്നവര്‍ ഈ കുതിരകയറ്റം നടത്തുന്നതിനു മുമ്പേ മൂന്നുവട്ടം ആലോചിക്കണം.. ആളുകളെ വിമാനത്തില്‍ കൊണ്ടിറക്കാന്‍ തല്‍ക്കാലം നടക്കുമെന്ന് തോന്നുന്നില്ല. ഒപ്പം പാഴായ സമയം തിരിച്ചെടുക്കാന്‍ കഴിയില്ല. വരുമ്പോള്‍ കശപിശ നടത്തി വീണ്ടും ദീര്‍ഘിപ്പിച്ചാല്‍ ആളുകളുടെ രക്ഷാപ്രവര്‍ത്തനം തടസപ്പെടുത്തുകയെ ഉള്ളൂ.. അടിക്കണം, തെറിവിളിക്കണം എങ്കില്‍ രക്ഷാപ്രവര്‍ത്തനം കഴിഞ്ഞിട്ട് പോരെ.. കാഴ്ചക്കാര്‍ ഉപകാരം ചെയ്തില്ലെങ്കിലും കാഴ്ച കാണുകയും ഫോറ്റൊഎടുക്കുകയും ചെയ്യുന്നത് ആളുകളെ രക്ഷിക്കുന്നവര്‍ക്ക് പാര ആവുന്ന രീതിയില്‍ ആവരുത്..

ആളുകളുടെ മരണത്തിന്റെ വില അറിയണം എങ്കില്‍ സ്വന്തം വീട്ടില്‍ ആരെങ്കിലും മരിക്കണം.. മരണം ആഘോഷം, വാര്‍ത്ത‍ ആക്കുന്നവര്‍ നാളെ സ്വന്തം വീട്ടില്‍ മരണം നടക്കുമ്പോള്‍ പഠിക്കും. കാരുണ്യം കാണിക്കണം എന്ന് പറയില്ല. കഠിനഹൃദയന്‍ ആവാതെയിരുന്നുകൂടെ....

Thursday, March 18, 2010

227.ഫാം വില്ലെ : കുറുക്കു വഴികള്‍

എന്തായാലും കഴിഞ്ഞ പോസ്റ്റ്‌ ഇട്ടപ്പോള്‍ ഈ കളിക്ക് മലയാള ബ്ലോഗര്‍മാര്‍ക്കിടയില്‍ നല്ല സ്വാധീനം ഉണ്ടെന്നു മനസ്സിലായി. കനല്‍, ചാര്‍ളി തുടങ്ങിയവരും ശ്രീ@ശ്രേയസ് പോലെ തുടങ്ങാന്‍ ആഗ്രഹിക്കുന്നവരുമായ ആളുകള്‍ക്ക് സഹായകമാവും ഈ പോസ്റ്റ്‌ എന്ന് വിശ്വസിക്കുന്നു.അല്ലാതെ പറഞ്ഞ വഴിയെ നടന്നില്ലെങ്കില്‍ നടക്കുന്ന വഴിയില്‍ പറയും എന്നതാണ് കൂതറ തിരുമേനിയുടെ പ്രമാണം.. കാശ് കൊടുത്ത് സ്വര്‍ണ്ണ നാണയവും എഫ്.വി. പോയന്റും വാങ്ങുന്നവരെ കൂതറ തിരുമേനിയ്ക്കറിയാം. അത്തരം വിവര ദോഷികള്‍ക്ക് വേണ്ടിയല്ല ഈ പോസ്റ്റ്‌.. ഓസിനു കാര്യം സാധിക്കാന്‍ സഹായിക്കാന്‍ വേണ്ടി മാത്രം..

ഒരു നല്ല നെറ്റ് വര്‍ക്ക് ആദ്യം തന്നെ ഉണ്ടാക്കണം. ഒറ്റയ്ക്ക് വല്ലതും നേടണമെങ്കില്‍ കാശ് മുടക്കണം.. ആദ്യം ഉള്ള കൂട്ടുകാരെ മുഴുവന്‍ ചേര്‍ക്കുക. കളിക്കാന്‍ മനസ്സും സമയവും തലയ്ക്കകത്ത് കിഡ്നിയും ഉള്ളവരും വേണം.. അല്ലാത്ത അണ്ടനേയും അടകൊടനെയും ഒക്കെ ചേര്‍ത്താല്‍ വേസ്റ്റ് തന്നെ.. അടുത്തതായി ചേര്‍ത്ത എല്ലാവരെയും നെയിബര്‍ ആയി ആഡ് ചെയ്യുക.. ഇടയ്കിടെ അവര്‍ക്ക് ഗിഫ്റ്റ് അയച്ചു കൊടുക്കുക.. (ഓസല്ലേ പിന്നെന്താ..) അവരോടും വല്ലതും അയച്ചു തരാന്‍ പറയുക.. കാരണം മരം, വേലി, മൃഗങ്ങള്‍ തുടങ്ങിയവ വാങ്ങാന്‍ നല്ല കാശ് കൊടുക്കണം.. ഓസിനു കിട്ടിയാല്‍ പുളിക്കില്ലല്ലോ.. വരുമാനവും കിട്ടും.. റിബണും.. അങ്ങനെയേ മുന്നോട്ടു പോകാന്‍ കഴിയൂ..

അടുത്തതാണ് ബ്ലോഗില്‍ നിന്നും പഠിച്ച ഏറ്റവും വല്ല്യ വിദ്യ ഇവിടെ ഉപയോഗിക്കുക എന്നത്.. നൂറു കണക്കിന് അനോണി ഐ.ഡി. ഉണ്ടാക്കിയവര്‍ അതെല്ലാം ഇവിടെയും ഉണ്ടാക്കി അങ്ങോട്ടും ഇങ്ങോട്ടും ഗിഫ്റ്റ് അയക്കുകയും പരസ്പരം (സ്വന്തം തന്നെ ) ഫാമില്‍ സഹായിക്കുകയും ചെയ്യുക.. അങ്ങനെ പോയിന്റ് കൂടുതല്‍ കിട്ടും..അതേപോലെ ഫാം വില്ലെയുടെ റിവ്യൂ പേജില്‍ പോയാല്‍ എന്നെ ചേര്‍ക്കൂ എന്നെ അയല്‍വാസി ആക്കൂ എന്നൊക്കെ കരഞ്ഞുകൊണ്ട്‌ പേര് കൊടുത്തവരുടെ ലിസ്റ്റ് കാണാം... ഇവരെല്ലാം കളി അസ്ഥിയ്ക്കു പിടിച്ചവരാണ്.. ഉറപ്പായും ഇവരെ ചേര്‍ക്കുക.. കാരണം കൂടുതല്‍ അയല്‍വക്കക്കാരന്‍ ഉണ്ടെങ്കിലെ കൂടുതല്‍ വസ്തു വാങ്ങാനും ഒക്കെ പറ്റൂ.. അതുകൊണ്ട് ഈ ഭ്രാന്തന്മാരെ ഉറപ്പായും ചേര്‍ക്കണം.. ഫാമില്‍ വാങ്ങിച്ച ട്രാക്ടര്‍, ഹാര്‍വേസ്റ്റര്‍, സീഡാര്‍ തുടങ്ങിയവയ്ക്ക് ഓസിനു ഡീസല്‍ ലഭിക്കാന്‍ മറ്റുള്ളവരുടെ ഫാമില്‍ വളം ഇട്ടുകൊടുത്താല്‍ മതി.. ഇടയ്ക്കിടെ മറ്റുള്ളവരുടെ ഫാമില്‍ കോഴിയ്ക്കു തീറ്റ കൊടുത്താല്‍ പോയിന്റും കിട്ടും ഓരോ സ്റ്റേജ് വേഗം പോവുകയും ചെയ്യും.. ഒപ്പം ഇടയ്ക്കിടെ മറ്റുള്ളവരുടെ ഫാമിലെ കുറുക്കന്,‍ കാക്ക, കിളികള്‍ ഇവയെ ഓടിച്ചാല്‍ അങ്ങനയൂം പോയിന്റ് കിട്ടും.

ഇനി നല്ല അയല്‍വക്കക്കാരനെ എങ്ങനെ തിരിച്ചറിയാം എന്നതാണ് വിഷയം. ഇതൊരു ടെക്നിക് ആണ്.. സമയം ഇഷ്ടപോലെ ഉള്ള അയല്‍വക്കകാരന്‍ ഉണ്ടെങ്കിലെ പ്രയോജനം ഉള്ളൂ.. തിരിച്ചറിയാന്‍ ഉള്ള മാര്‍ഗ്ഗങ്ങള്‍

1.ഇവര്‍ ഇടയ്ക്കിടെ വസ്തു വാങ്ങും .. മരങ്ങളും മറ്റും ഇടയ്ക്കിടെ വാങ്ങും..
2.ഇവര്‍ ഇടയ്ക്കിടെ ഫാമിലെ കൃഷി രീതികള്‍ , ഡിസൈന്‍ ഒക്കെ മാറ്റും.(വേറെ പണി ഇല്ലല്ലോ..)
3.ഇവരുടെ ഫാമിലെ കൃഷികള്‍ കുറഞ്ഞ സമയം കൊണ്ട് വിളവെടുക്കുന്നത് ആയിരിക്കും..കാരണം ജോലിയുള്ളവര്‍ ഇപ്പോഴും ഇതും കളിച്ചു ഇരിക്കില്ലല്ലോ.
4.ഇവരുടെ സ്റ്റേജ് ഇടയ്ക്കിടെ മാറിക്കൊണ്ടിരിക്കും..(കൂടും എന്ന് സാരം)
5.ഇവര്‍ ഇടയ്ക്കിടെ ഓരോ ഗിഫ്റ്റ് അയച്ചു തരും..

ഇത്രയും ആയാല്‍ അല്ലെങ്കില്‍ ഓര്‍ത്താല്‍ നിങ്ങള്‍ക്കും പെട്ടെന്ന് നല്ലൊരു കൃഷിക്കാരന്‍ ആവാം..

Tuesday, March 16, 2010

226.ബ്ലോഗറെ കൊല്ലുന്ന ഫേസ്ബുക്കിലെ കളികള്‍..

ഫേസ്ബുക്കിന്റെ വളര്‍ച്ച ഗൂഗിളിന്റെ ഓര്‍ക്കുട്ടിനെ ഞെട്ടിച്ചുവെങ്കില്‍ ഫേസ്ബുക്കിലെ കളികള്‍ ഇപ്പോള്‍ പല പ്രമുഖ ബ്ലോഗെഴുത്തുകാരെയും തന്റെ നീരാളിപ്പിടിയില്‍ ഒതുക്കിയിരിക്കുകയാണ്. മലയാളത്തിലെ പല പ്രമുഖ ബ്ലോഗര്‍മാരും ഇപ്പോള്‍ ഫേസ്ബുക്കിന്റെ ഫാംവില്ലെ, ഫിഷ്‌വില്ലെ , മാഫിയ, കഫെ വില്ലെ തുടങ്ങിയ കളികളുടെ ഇരകളാണ്..

ആദ്യം എന്താണു ഇത്തരം കളികളുടെ പ്രശ്നം എന്ന് നോക്കാം.. സിംഗ എന്നാ പട്ടിയുടെ പടമുള്ള ഗേം കമ്പനിയാണ് ഫേസ് ബുക്കിനു വേണ്ടി ഈ കളികള്‍ തയ്യാറാക്കുന്നത്.. ആളുകളുടെ ഓണ്‍ലൈന്‍ സാന്നിധ്യം കണക്കിലെടുത്ത് പരസ്യവരുമാനം കിട്ടുന്നതുകൊണ്ട് ഫേസ് ബുക്കിനു കിട്ടുന്നത് കോടിക്കണക്കിനു ഡോളര്‍ ആണ്. ഏകദേശം ഒന്‍പതു കോടി സജീവ കളിക്കാരാണ് ഫാം വില്ലെ ഗെമിനുള്ളത്‌. മറ്റുള്ള ഫേസ് ബുക്ക്‌ സുഹൃത്തുകളും കൂടി കളിക്കാനുള്ള സൌകര്യമുള്ളത് കൊണ്ട് ഒരുതരം അഡിക്ഷന്‍ ഈ ഗെമിനുണ്ട്.. സ്വയം ഓരോ സ്റ്റേജില്‍ എത്തുന്നത് പോലെ അത് മറ്റുള്ളവരെ അറിയിക്കാനുമുള്ള സൌകര്യവും ഉണ്ട്.. അതുകൊണ്ട് തന്നെ കൂട്ടുകാരോട് ഒരു മത്സരം ഉണ്ടാവുന്നു.. ഒപ്പം തന്റെ ഫാം കൂടുതല്‍ മികച്ചതാക്കാനും സുന്ദരമാക്കാനും ശ്രമിക്കുന്നു.. നമ്മുടെ ആത്മാവ് ഗ്രാമത്തില്‍ ആണെന്ന് കൂതറ തിരുമേനി വിശ്വസിക്കുന്നത് കൊണ്ടുതന്നെ കൃഷിയെ അങ്ങേയറ്റം ബഹുമാനിക്കുന്നുമുണ്ട്.. എന്നാണ് നമ്മുടെ വിലയേറിയ സമയം ഈ വിര്‍ച്ച്വല്‍ കൃഷിയ്ക്ക് ചിലവഴിക്കുന്നത് കൂതറ തിരുമേനി അംഗീകരിക്കുന്നില്ല.

ജോലികഴിഞ്ഞ് വരുന്ന ഭാര്യയും ഭര്‍ത്താവും വീട്ടിലെത്തി ആദ്യം തന്റെ ഗെമിലെ കൃഷി എവിടെ വരെയെത്തി എന്ന് നോക്കുന്നത് വരെയെത്തുമ്പോള്‍ കാര്യം വഷളാവുന്നു. അടുത്തിടെ ഇതേപോലെ ഒരു ഗെമില്‍ കുട്ടിയെ വളര്‍ത്തുന്ന ഗേം കളിച്ചു ഭാര്യയും ഭര്‍ത്താവും സ്വന്തം കുട്ടിയെ നോക്കാതെ കുട്ടി മരിച്ച സംഭവം ഇതിന്റെ ഏറ്റവും മോശം അനുഭവത്തില്‍ ഒന്നാണ്. ജോലികഴിഞ്ഞ് വരുന്ന ഭാര്യ കുപ്പായം പോലും മാറാതെ നേരെ ലാപ്ടോപ്പില്‍ ഗേം കളിക്കാനിരിക്കുന്ന രീതിയില്‍ അമര്‍ഷം പൂണ്ട ഭര്‍ത്താവ് ഇന്ന് ഇതിന്റെ ഏറ്റവും അഡ്വാന്‍സ് സ്റ്റേജില്‍ കളിക്കുന്ന ആളായി പോയ കേസും കൂതറ തിരുമെനിയ്ക്കറിയാം.. ഒരിക്കല്‍ കളിച്ചു ഇതിന്റെ ടെക്നിക് പഠിച്ചാല്‍ പിന്നെ തിരിച്ചുവരവ് അസാധ്യം ആണെന്ന് വേണം പറയാന്‍.. രാത്രിയില്‍ ടൈം പീസില്‍ അലാറം വെച്ച് കൃഷിയില്‍ നിന്ന് വിളവെടുക്കുന്ന ഭാര്യമാരും ഭര്‍ത്താക്കന്മാരും തങ്ങളുടെ ദാമ്പത്ത്യത്തില്‍ വിള്ളല്‍ വീഴുന്നത് അറിയുന്നില്ല.. കുട്ടികള്‍ തങ്ങളുടെ മാതാപിതാക്കള്‍ ഗെമില്‍ തിരക്കവുംപോള്‍ തങ്ങളെ ശ്രദ്ധിക്കാന്‍ ആരുമില്ലെന്ന തിരിച്ചറിവില്‍ ഉണ്ടാവുന്ന മാനസിക പ്രശ്നങ്ങള്‍ ആരും തിരിച്ചറിയുന്നില്ല..

ഇത്രയും പ്രശ്നങ്ങള്‍ മാത്രമല്ല നല്ലപോലെ ബ്ലോഗ്‌ എഴുതിക്കൊണ്ടിരുന്നവര്‍ പലരും ഇന്ന് ഈ ഗെമില്‍ സജീവമാണ്.. ബ്ലോഗ്‌ എഴുതാനോ ബ്ലോഗ്‌ വായിക്കാനോ സമയം കണ്ടെത്താന്‍ ഇവര്‍ക്ക് കഴിയുന്നില്ല. ഈ സമയം കൊല്ലി കളിയില്‍ തങ്ങളുടെ നൈസര്‍ഗ്ഗീകമായ സര്‍ഗ്ഗശേഷി നിശ്ശേഷം ഇല്ലാതാവുന്നത് ഇവര്‍ തിരിച്ചറിയണം.. ഒരുഗുണവും ചെയ്യാത്ത ( കമ്പനി കോടികള്‍ ഉണ്ടാക്കുമെന്നല്ലാതെ ) ഈ കളികള്‍ ഉപേക്ഷിച്ചു പ്രൊഡക്ടീവ് ആയ വല്ലതും ചെയ്യുന്നതാവും നല്ലത്.. അഡിക്ഷന്‍ മാറ്റാന്‍ വളരെ പ്രയാസം ആണ്. പക്ഷെ ഒരിക്കല്‍ ആ അഡിക്ഷന്‍ മാറിയാല്‍ വീണ്ടും അതിലേക്കു പോവാതെ ഇരിക്കാനും ശ്രദ്ധിക്കണം..

നിങ്ങള്‍ ശ്രദ്ധിക്കേണ്ട കാര്യങ്ങള്‍ ..

1.നിങ്ങളുടെ ആകെ കമ്പ്യൂട്ടര്‍ ഉപയോഗത്തിന്റെ തൊണ്ണൂറു ശതമാനവും ഈ ഗെമിന് വേണ്ടി ചിലവാക്കുന്നുണ്ടോ..
2.നിങ്ങള്‍ കൂട്ടുകാരെ വിളിക്കാതെ ഗെമില്‍ മുഴുകുന്നുണ്ടോ..
3.നിങ്ങള്‍ ഭക്ഷണം കുളി പ്രാര്‍ത്ഥന വായന തുടങ്ങിയ മുടക്കി ഗേം കളിക്കുന്നുണ്ടോ..
4.ജോലിയില്‍ നിന്ന് വന്നാല്‍ ആദ്യം ഗേം കളിയ്ക്കാന്‍ തോന്നുന്നുണ്ടോ..
5.ഇടയ്ക്കിടെ ഗേം കളിച്ചില്ലെങ്കില്‍ വിഷമവും വെപ്രാളവും തോന്നുന്നുണ്ടോ..

ഇതെല്ലാം നിങ്ങള്‍ അതെയെന്നു ഉത്തരം പറഞ്ഞാല്‍ നിങ്ങള്‍ ഈ കളിയുടെ അഡിക്റ്റ് ആണെന്ന് പറയാം.. ബന്ധങ്ങളില്‍ വിള്ളലുകള്‍ വരുത്തുന്ന ഈ കളികള്‍ ഒരു ചെറിയ സമയം വളരെ നല്ലതാണു.. എന്നാല്‍ അഡിക്ഷന്‍ ആയാല്‍ ഒരുപക്ഷെ ചികിത്സ വരെ വേണ്ടിവന്നേക്കാം.. ദിവസം പതിനാറു മണിക്കൂര്‍ വരെ കളിക്കുന്നവര്‍ മുതല്‍ ഭക്ഷണം കഴിക്കാതെ വരെ ഗേം കളിക്കുന്നവര്‍ വരെയുണ്ട്.. ട്രാക്ടര്‍ വാങ്ങാനും വസ്തു കൂടുതല്‍ വാങ്ങുവാനും വേണ്ടി അഹോരാത്രം ഗേം കളിക്കുന്നവര്‍ തങ്ങളുടെ പ്രീയപ്പെട്ടവരില്‍ നിന്നും അകലുകയാണ് എന്ന് മനസ്സിലാക്കുന്നില്ല.. തോട്ടത്തില്‍ അയല്‍ വക്കക്കാര്‍ ഇല്ലാത്തതിനാല്‍ അനോണിയായി പത്തോളം പേരില്‍ കളി തുടങ്ങി ഗേം കളിക്കുന്നവര്‍ വരെയുണ്ട്.. അവസാനം ഈ ഓരോ ഐഡികളും എന്നും ഓണാക്കി കളിച്ചു കമ്പ്യൂട്ടറിന്റെ മുമ്പില്‍ നിന്ന് മാറാന്‍ പോലും സമയമില്ലാതെ ചിലര്‍ വിഷമിക്കുന്നു..

കളികള്‍ മാനസികോല്ലാസത്തിനു വേണ്ടിയാണു.. നമ്മളെ അടിമ ആക്കാന്‍ അല്ല. കളികളില്‍ സ്വന്തം ജീവിതവും ബന്ധങ്ങളും മറക്കാതെ ഇരിക്കാന്‍ ശ്രമിക്കുക.

Friday, March 12, 2010

225.ബ്രൌസര്‍ ...ചുമ്മാതെ

നെറ്റില്‍ തെണ്ടി തിരിയുന്നവര്‍ക്ക് അത്യാവശ്യം വേണ്ട ഒന്നാണ് വെബ് ബ്രൌസര്‍.. എന്തൊക്കെ നെറ്റില്‍ ഉണ്ടെന്നു കണ്ടെത്താന്‍ ഇവനെ കൂടിയേ തീരൂ.. ഇന്റര്‍നെറ്റ് എക്സ്പ്ലോററിനെ പരസ്യമായി തെറി പറയുകയും രഹസ്യമായി ഉപയോഗിക്കുകയും ചെയ്യുന്ന ഫ്രീ സോഫ്റ്റ്‌വെയര്‍ പ്രേമികള്‍ മുതല്‍ മോസില്ല കണ്ടില്ലെങ്കില്‍ കക്കൂസില്‍ പോകുമ്പോള്‍ "ആസി"ല്ലാതവനെ പോലെ പെരുമാറുന്നവര്‍ വരെ ഉണ്ട്. എന്നാല്‍ ഈ രണ്ടു കക്ഷികളെയും ഒന്ന് മാറ്റി പിടിക്കാനാണ് ഈ പോസ്റ്റ്‌ ഇടുന്നത്. ഓസിനു കിട്ടിയാല്‍ ആസിഡും കുടിക്കുന്ന മലയാളികള്‍ക്ക് ഏറ്റവും പ്രയോജനം ചെയ്യുമന്ന് കരുതുന്നു..

ഗൂഗിള്‍ ബ്രൊസര്‍ യുദ്ധത്തില്‍ ഇറങ്ങിയപ്പോള്‍ ഇറക്കിയ തുറുപ്പാണ് ഗൂഗിള്‍ ക്രോം. ഇപ്പോഴും മാക്രി കരയുന്നപോലെ ക്രോം ക്രോം എന്ന് ഒച്ചവക്കനല്ലാതെ കാര്യമായ ഒരു ചലനം സൃഷ്ടിക്കാന്‍ കഴിഞ്ഞിട്ടില്ല.. ക്രോമിന്റെ ആരാധകര്‍ ക്ഷമിക്കുക.. ഒള്ളത് പറയുമ്പോള്‍ അംഗീകരിക്കണം കേട്ടോ.

ടാറ്റാ സഫാരിയും ആഫ്രിക്കയിലെ കെനിയ സഫാരിയും മാത്രം കേട്ടിട്ടുള്ളവര്‍ക്ക് പരീക്ഷിക്കാന്‍ ആപ്പിളിന്റെ (നമ്മുടെ സില്‍ക്ക് സ്മിത കടിച്ച അപ്പിളല്ല) ബ്രൌസര്‍ ആണ് ആപ്പിള്‍ സഫാരി.. നമ്മുടെ പ്രിയങ്കരനായ മമ്മൂട്ടി വരെ ഇവന്റെ വലിയ ആരാധകന്‍ ആണ്..

ഓപ്പറ പാടി നടന്നു അധികം പെരെടുത്തെങ്കിലും പിന്നീട് അടിഞ്ഞുകൂടിയ ആളാണ്‌ ഓപറ.. എന്നാല്‍ പുതിയ ഓപ്പറ വല്ല്യ കുഴപ്പം ഇല്ലെന്നു തോന്നുന്നു.

ഇനിയും ചില പിള്ളേരെ പരിചയപ്പെടാം..

1. അവന്ത്‌ ബ്രൌസര്‍ (വല്ല്യ തരക്കേടില്ല.. ഉപയോഗിക്കാറുണ്ട്..)

2.ഗ്രീന്‍ ബ്രൌസര്‍ (അണ്ടര്‍ വെയര്‍ വരെ പച്ച വേണം എന്ന് വാശിയുള്ളവര്‍ വിടല്ലേ.. ഇത് തന്നെ ഉപയോഗിച്ചോ..)

3.)സ്ലീപ്നിര്‍ (എനിക്കിഷ്ടമാണ് .. നിങ്ങള്‍ ഉപയോഗിച്ച് പറ...)

4)മക്സ്തോന്‍ (ശരാശരി..)

5)കെ മെലോണ്‍ (നമ്മുടെ മോസിലയുടെ സഹോദരന്‍... അപ്പോള്‍ അവരുടെ ഫാന്‍സ്‌ ഇഷ്ടപ്പെടും)

6)ഫ്ലോക് (കുഴപ്പമില്ല )

7)സ്ലിം ബ്രൌസര്‍ (സിസ്റ്റത്തില്‍ വല്ല്യ ലോഡ് കൊടുക്കില്ല. ഡയറ്റിംഗ് ചെയ്യുന്നവര്‍ നോക്കണേ..)

Wednesday, March 3, 2010

224.അച്ചുതണ്ട് വരെ മാറിപ്പോയല്ലോ ദൈവമേ..

2012 സിനിമ കണ്ടപ്പോള്‍ മുതല്‍ കൂതറ തിരുമേനിയ്ക്കൊരു പേടി.. ഈ ഭൂമി അങ്ങ് അവസാനിച്ചു പോവുമോ..? എന്തോരം ബൂലോകവാസികളെ തിരുമേനി എഴുതി എഴുതി കൊല്ലുന്നു.. അതിലൂടെയുള്ള അവര്‍ണ്ണനീയമായതും അത്യന്തം ഗോപനീയതുമായുള്ള ആത്മഹര്‍ഷം വളരെ വലുതാണ്‌. ഭൂമി അവസാനിച്ചുപോയാല്‍ ബ്ലോഗ്‌ എഴുതാന്‍ കഴിയില്ലെന്നുള്ള വിഷമത്തില്‍ ഉറക്കം വരെ നഷ്ടപ്പെട്ടു. ഡയസപാം അഞ്ചു മില്ലി മാറി ഏഴുവരെ ആയി ഇപ്പോള്‍.. ഇനി ഉറങ്ങാന്‍ പത്തു മില്ലിഗ്രാം വരെ കഴിക്കണമോ എന്നുള്ള പേടിയുമുണ്ട്. അല്ല ഭൂമി അങ്ങനെ അങ്ങ് അവസാനിക്കുമോ..? ബൂലോകത്തുള്ള പരമ ദ്രോഹികളെയും വൃത്തികെട്ട അനോണികളെയും നരകിപ്പിച്ചു നശിപ്പിക്കാതെ ഒറ്റയടിക്ക് കൊന്നാല്‍ പിന്നെ എന്തോന്ന് അവസാനം...!

അഞ്ചു വര്‍ഷം മുമ്പൊരു സുനാമി.. പിന്നെ പലയിടത്തും പല തരത്തിലുള്ള ഭൂമി കുലുക്കവും സുനാമികളും പന്നിപ്പനി മുതല്‍ സിനിമാപ്പനി വരെയുള്ള അസുഖങ്ങള്‍ സാമ്പത്തിക മാന്ദ്യം തുടങ്ങി എല്ലാ ഉടായിപ്പുകളും കണ്ടപ്പോള്‍ ഭൂമി അവസാനിക്കാറായി എന്ന് തോന്നിപ്പോയി.. മോഹന്‍ലാലിന്റെ സാഗര്‍ ഏലിയാസ് ജാക്കിയും ഏഞ്ചല്‍ ജോണും ഭഗവാനും മമ്മൂട്ടിയുടെ പട്ടണത്തില്‍ ഭൂതവും കണ്ടപ്പോള്‍ ഭൂമി അവസാനിച്ചാല്‍ മതിയെന്ന് ആത്മാര്‍ഥമായി ആഗ്രഹിച്ചു.. അഴീക്കോടിന്റെ വളിപ്പുകള്‍ കേട്ടപ്പോള്‍ ആ ആഗ്രഹത്തെ ഊട്ടിയുറപ്പിച്ചു.. ഇടയ്ക്ക് ഒരു അവതാര്‍ 3D കണ്ടപ്പോള്‍ ആ ആഗ്രഹത്തിന് അല്പം മാറ്റമുണ്ടായി എന്നത് നേര്.. അപ്പോള്‍ സിനിമയാണോ ജീവിക്കാന്‍ പ്രേരണ തരുന്നതെന്ന് സംശയമുള്ളവര്‍ "ലയനം " എന്നാ സിനിമ കണ്ടിട്ട് വാ.. എന്നിട്ട് ബാക്കി പറയാം.. അല്ലെങ്കില്‍ ഏഴിമല പൂഞ്ചോല , പുഴയോരത്തു പൂത്തോണി എത്തിയില്ല എന്നീ ഭക്തിഗാനങ്ങള്‍ കേട്ടിട്ട് വന്നാലും മതി.. അല്ലാതെ പിന്നെ.

ഇനി കാര്യം.. ഈ നരസിംഹം പോലെയുള്ള ലാലേട്ടന്‍ " ഭൂമിയുടെ അച്ചു തണ്ട് എന്റെ കൈയിലാണ്... ഞാന്‍ എടുത്തു അമ്മാനമാടും... ശംഭോ മഹാദേവാ സവാരി ഗിരി ഗിരി " എന്നൊക്കെ പുലമ്പുംപോള്‍ സത്യത്തില്‍ ഈ അച്ചുതണ്ട് ഒന്ന് മാറിയാല്‍ എന്ത് പറ്റുമെന്ന് കരുതിയിട്ടുണ്ടോ.. പാര്‍ട്ടിയുടെ അച്ചുതണ്ട് എന്റെ കൈയിലാണ് എന്ന് കരുതുന്ന അച്ചുമാമന്റെ കാര്യം വിട്.. ഇത് കാര്യമായ ഒരു വിഷയമാണ്‌. ഭൂമി ഒരു സാങ്കല്‍പ്പിക അച്ചുതണ്ടിലാണ് ഇരുപത്തി നാല് മണിക്കൂര്‍ കൊണ്ട് സ്വയം കറങ്ങുന്നതെന്നു ഓച്ചിറക്കാളയ്ക്ക് പോലും അറിയാം (ഈ ഓച്ചിറക്കാളയും ബ്ലോഗര്‍ അരുണ്‍ കായം കുളവും തമ്മില്‍ ഒരു ബന്ധവും ഇല്ലെന്നു കൂതറ തിരുമേനി ഇവിടെ സത്യവാങ്ങ് സമര്‍പ്പിക്കുന്നു). അപ്പോള്‍ അച്ചു തണ്ട് അല്‍പ്പം മാറിയാലോ..?

റിച്ചാര്‍ഡ് ഗ്രോസ് എന്നാ നാസയിലെ ശാസ്ത്രജ്ഞന്‍ ഈ കഴിഞ്ഞ ചിലി ഭൂമികുലുക്കത്തില്‍ ഭൂമിയുടെ അച്ചുതണ്ട് മാറിയെന്നു കണ്ടെത്തി.. (8.8 ആയിരുന്നു ഈ ഭൂമി കുലുക്കത്തിന്റെ തീവ്രത ).. ഈ അച്ചുതണ്ട് മാറിയത് കൊണ്ട് നമുക്കെന്തു നഷ്ടം എന്നാവും ചോദ്യം.. നഷ്ടമല്ലേയുള്ളൂ... അച്ചുതണ്ടില്‍ നിന്ന് മാറിയത് ഏകദേശം എട്ടു സെന്റി മീറ്റര്‍ ആണെന്നാണ് കണ്ടെത്തിയത്... അതുകൊണ്ടുള്ള നഷ്ടം നമുക്ക് ഓരോ ദിവസവും ഒന്നര മൈക്രോ സെക്കണ്ട് നഷ്ടമാവും.. ഇതിലും വല്ല്യ ഭൂമികുലുക്കം ഇന്‍ഡോനേഷ്യയില്‍ (9.1) വന്നപ്പോള്‍ ഇത്രയും വ്യത്യാസം ഉണ്ടാവാഞ്ഞത്‌ ഭൂമികുലുക്കത്തിന്റെ പ്രഭാവ കോണിന്റെ കുറവ് കൊണ്ടായിരുന്നുപോലും.. അത് നന്നായി... അങ്ങനെ അച്ചു തണ്ട് മാറി മാറി ദിവസത്തിന്റെ ദൈര്‍ഘ്യം കുറഞ്ഞിരുന്നെങ്കില്‍ നമുക്ക് ഓഫീസില്‍ കുറച്ചു മണിക്കൂര്‍ ജോലി ചെയ്‌താല്‍ മതിയാരുന്നു.. അല്ലെ.. എന്തൊരു സുഖം...

വെര്‍ട്ടിക്കല്‍ ആയി ഈ ചലനവും പുനര്‍ സ്ഥാപനവും അല്‍പ്പം കടുത്തുപോയോ എന്ന് തോന്നുന്നു.. കാരണം അന്ന് സുനാമിയുടെ കൂടെ ഉണ്ടായ ഭൂമി കുലുക്കത്തില്‍ മാറിയത് ഏഴു സെന്റി മീറ്റര്‍ ആയിരുന്നെങ്കില്‍ സമയം പോയത് (കുറഞ്ഞത്‌ ) ആറര മൈക്രോ സെക്കണ്ട് ആയിരുന്നു.. ഇങ്ങനെ ഓരോ കുലുക്കത്തിലും സമയം കുറഞ്ഞു പോയാല്‍ പിന്നെ നമ്മള്‍ എന്തോ ചെയ്യും..?

ഇനി ഇതിനൊക്കെ എന്ത് പ്രതിവിധി എന്ന് നോക്കാം.. ഭാരതത്തിലെ ഏറ്റവും ബുദ്ധിശാലികളും പ്രതികരണ ശേഷിയുള്ളവരുമായ കേരള ജനത ഇതിനെതിരെ ശക്തിയായി പ്രവര്‍ത്തിക്കണം.. നമുക്കല്ലേ നൂറു ശതമാനം സാക്ഷരതയുള്ളത്..

* ഒരു മത സൌഹാര്‍ദ്ധ ജാഥയും സമ്മേളനവും നടത്തുക..

*ബന്ത് , ഹര്‍ത്താല്‍ , പണിമുടക്ക്‌ തുടങ്ങിയവാ നടത്തുക.. കഴിവതും ആ സമയം നോക്കി കുറെ അടിച്ചു തകര്‍ക്കലുകള്‍ കൊള്ളയടിക്കല്‍ തുടങ്ങിയവയും നടത്തുക..

*ഭരണകഷിയുടെ നിഷ്ക്രിയ സമീപനത്തിനെതിരെ ശക്തമായി പ്രതിരോധിക്കുക..

*രാഹുല്‍ മോനെ കൊണ്ടുവന്നു രണ്ടു തട്ടുകടകളില്‍ നിന്ന് ദോശ വാങ്ങിക്കൊടുത്തു ഞങ്ങള്‍ പാവങ്ങളുടെ കൂടെയാണെന്ന് തെളിയിക്കുക..

*അമ്മച്ചിയും കേട്ടുള്ള അങ്കിളും ടിവിയില്‍ രണ്ടു പ്രസംഗ പരമ്പര നടത്തുക.. സംസ്ഥാന സര്‍ക്കാരിന്റെ കഴിവ് കേടുകൊണ്ടാണ് ഇത് സംഭവിച്ചതെന്നു പറയുക..

* നമ്മളെല്ലാം പ്രതികരിച്ചില്ലെങ്കില്‍ നമ്മുടെ കുട്ടി സംഘടനകള്‍ക്ക് അവസരം കൊടുക്കുക.. (അടിച്ചു തകര്‍ക്കാന്‍ അവരല്ലേ മിടുക്കര്‍ )

ഈ വമ്പന്‍ പ്രക്ഷോഭത്തില്‍ നിങ്ങളെല്ലാം പങ്കുചെരുമെന്നു കൂതറ തിരുമേനി വിശ്വസിക്കട്ടെ ...

Tuesday, March 2, 2010

223.ഒരു പോസ്റ്റിന്റെ പിന്നിലെ കളികള്‍

കുറിമാനം : ഇതെന്റെ അനുഭവമല്ല.. ജീവിച്ചിരിക്കുന്നവരുമായോ മരിച്ചവരുമായോ സാമ്യം തോന്നിയാല്‍ അത്ഭുതപ്പെടേണ്ട..! സത്യമാവാന്‍ സാധ്യതയുണ്ട്...

കഥയെഴുതുന്നവന്‍ കക്കൂസില്‍ ടിഷ്യൂ പേപ്പറില്‍ കഥ (കവികള്‍ കവിതകള്‍ എഴുതുന്നു എന്നുമാത്രം.) എഴുതുന്നത്‌ പോലെ ബ്ലോഗെഴുത്തുകാര്‍ പോസ്റ്റ്‌ എഴുതുന്ന ചില രീതികള്‍ .. അപാര എഴുത്തിന്റെ അസുഖമുള്ളവര്‍ ലാപ്ടോപ് കക്കൂസില്‍ വെച്ച് പോസ്റ്റ്‌ എഴുതി പബ്ലിഷ് ചെയ്തുവെന്ന് വരാം.. ഇതങ്ങനെയുള്ള രീതിയല്ല.. ചില എഴുത്തിനു നിദാനമാകുന്ന സംഗതികള്‍ അപഗ്രഥിക്കുന്നുവെന്ന് മാത്രം.

രംഗം 1

കൂട്ടുകാരോടൊത്ത് ബാറില്‍ വെള്ളം അടിക്കുമ്പോള്‍ കൂട്ടത്തിലെ തമാശക്കാരനും അത്ര പരിഷ്കാരിയും അല്ലാത്ത ഒരുത്തന്‍ അടിച്ച ജോക്ക് വീണ്ടും വീണ്ടും ഓര്‍ത്ത്‌ പൊലിപ്പിച്ചു തന്റേതെന്ന മട്ടില്‍ മസാല ചേര്‍ത്തു എഴുതി പിറ്റേന്ന് വായനക്കാരുടെ കമന്റില്‍ പുളകം കൊണ്ട് ആത്മനിര്‍വൃതി അടയല്‍. ഇടയ്ക്കിടെ നല്ല തമാശ തട്ടിവിടുന്ന കൂട്ടുകാര്‍ക്കിടയില്‍ പഴഞ്ചന്‍ തമാശ തട്ടി വിടുന്നു. പിന്നീട് അവന്‍ ഇത് കേട്ട് സഹികെട്ട് നല്ല "വിറ്റുകള്‍" ഇറക്കുന്നു. അത് അതേപോലെ തന്നെ ചൂടോടെ പോസ്റ്റില്‍ തട്ടുന്നു.. അപ്പോള്‍ സാര്‍ വീണ്ടും ഒരു ഹിറ്റ്‌ പോസ്റ്റ്‌ കൂടി തട്ടിയല്ലോ എന്നുള്ള കമന്റില്‍ രോമാഞ്ച കഞ്ചുകം അണിയുന്നു.. രോമം ഇല്ലാത്തവന്‍ ഗള്‍ഫ്‌ ഗേറ്റില്‍ ശരീരത്തില്‍ രോമം ഫിറ്റു ചെയ്യുന്ന സാധ്യതകളെ പറ്റി ഓര്‍ത്ത്‌ നെടുവീര്‍പ്പിടുന്നു..

രംഗം 2
അടുത്ത വീരന്‍ മതപരം മാത്രമേ താങ്ങൂ.. പെന്തക്കൊസുകാരന്‍ ഇറക്കുന്ന പുസ്തകവും ഇസ്ലാമിക് പബ്ലിക്കെഷന്റെ പുസ്തകവും അല്ലെങ്കില്‍ മറ്റുള്ള ഹൈന്ദവ പുസ്തകങ്ങളുടെയും മൂന്ന് പേജ് വായിച്ചു തന്നാലായതും മറ്റുള്ളവര്‍ എവിടെയെങ്കിലും വിവരണമോ അവലോകനന്മോ നടത്തിയത് അതേപോലെ പോസ്റ്റില്‍ തങ്ങുന്നു.. അതാതു മതത്തിലുള്ളവന്റെ ഒരു ചെറിയ തലോടലും മറ്റു മതത്തിലുള്ള വായനക്കാരന്റെ ചെറിയ ഉന്തോ തള്ളോ കിട്ടിയാലും കമന്റ് നൂറു കയറുമല്ലോ..അതോടെ ഉള്ളം തണുക്കും..

രംഗം 3
ഇത് രാഷ്ട്രീയം കൈകാര്യം ചെയ്യുന്നവന്റെ സ്വന്തം.. രാവിലെ തന്നെ വിവരമുള്ള (ആണോ ... ആര്‍ക്കറിയാം ) വിദ്യാഭാസമുള്ള പത്രക്കാര്‍ എഴുതിയ വാര്‍ത്തകള്‍ കുറെ വായിക്കും. യൂണിക്കോഡില്‍ കിട്ടിയാല്‍ അങ്ങനെതന്നെ കോപ്പിയടിക്കാം.. അല്ലെങ്കില്‍ മറ്റു ഫോണ്ടിനെ യൂണിക്കോഡ് ആക്കുന്ന ടൂളുകള്‍ ഉപയോഗിച്ച് കോപ്പിയടിച്ചു പോസ്റ്റ്‌ ഒന്നാക്കും.. അല്പം മാറ്റങ്ങളും ചേരുവകളും ചേര്‍ത്തു ഒരു മികച്ച പോസ്റ്റെന്ന അഭിപ്രായം കിട്ടുമ്പോള്‍ ഒറിജിനല്‍ എഴുതിയവന്റെ കണ്ണില്‍ പെടല്ലേ എന്നുള്ള പ്രാര്‍ത്ഥന മാത്രമായിരിക്കും..

രംഗം 4
കിട്ടിയ കള്ളും (ഓസിനു) കുടിച്ചു വല്ലകവികളും എഴുതിയ കവിതകള്‍ പാടി നടക്കുമ്പോള്‍ ഒന്നും ഓര്‍മ്മ വരാത്തതുകൊണ്ട് കിട്ടിയ വരികള്‍ വെച്ച് പാട്ട് പാടുന്നു.. അല്ലെങ്കില്‍ വായില്‍ വരുന്നത് കോതയ്ക്ക് പാട്ടെന്ന സിദ്ധാന്തം വെച്ച് കവിത ചൊല്ലുന്നു.. പിറ്റേന്ന് അതേപോലെ തന്നെ എഴുതിയെടുത്തു പോസ്റ്റ്‌ ആക്കുമ്പോള്‍ മലയാളത്തിനു മറ്റൊരു കവിയെകൂടി കിട്ടി.. സ്വന്തം കാശിനു കള്ള് വാങ്ങി കുടിച്ചു ബാക്കിയെല്ലാം ചെയ്താലും ഫലം ഒന്നുതന്നെ.. ചവറു പോലെ കവിത നൂറു.. ഏതെങ്കിലും അല്പം ഭേദമായാല്‍ പിന്നെ കവി തന്നെ കവി..

രംഗം..5

അല്പം വിവരം ഉണ്ടെങ്കില്‍ (ഇല്ലെങ്കിലും കുഴപ്പമില്ല.. ഇംഗ്ലീഷ് വായിച്ചു മനസ്സിലാക്കാന്‍ കഴിഞ്ഞാല്‍ മതി ) വല്ല ഇംഗ്ലീഷ് ബ്ലോഗുകള്‍ വായിച്ചു ആശയം അടിച്ചുമാറ്റി പോസ്റ്റ്‌ ഇട്ടാല്‍ മതി.. അവര്‍ എവിടെ ഈ ചവര്‍ ബ്ലോഗ്‌ കണ്ടുപിടിക്കും.. നമ്മുടെ പോസ്റ്റ്‌ ഹിറ്റായാല്‍ ഈ കൂപ മണ്ടൂകം രക്ഷപ്പെട്ടില്ലേ.. അല്ല ഇതി തമിഴ്, തെലുഗു, ഹിന്ദി ഒക്കെ അറിയാമെങ്കില്‍ പിന്നെ അവിടെ നിന്നും അടിച്ചു മാറ്റാമല്ലോ... എന്തായാലും ബ്ലോഗ്‌ ഹിറ്റായാല്‍ മതിയല്ലോ..

രംഗം 6

ഇടയ്ക്കെപ്പോഴോ പണ്ട് കണ്ട സിനിമയിലെ കഥ അവ്യക്തമായി ഓര്‍മ്മ വരുമ്പോള്‍ അടിച്ചുമാറ്റി അല്പം ട്വിസ്റ്റ്‌ കൊടുത്ത് വേറെ രീതിയല്‍ ആക്കി പോസ്റ്റ്‌ ഇടാമല്ലോ.. നമുക്കോ ഓര്‍മ്മയില്ല പിന്നല്ല മറ്റുള്ളവര്‍ ഓര്‍ക്കാന്‍.. അഥവാ കണ്ടെത്തിയാല്‍ അതെല്ലാം കേവലം പ്രേരണ മാത്രം ആഎന്നു പറയണം.. അല്ലാതെ.. നമ്മുടെ അനുമാലിക് ചേട്ടന്‍ പറ്റും പ്രിയദര്‍ശന്‍ സിനിമയും ഒക്കെ ഇങ്ങനെ പ്രേരണ കിട്ടി ചെയ്യാറില്ലേ... അതുപോലെ..

നര്‍മ്മം രംഗം 7

ഇനിയുള്ളത് മൂടോടെ അടിച്ചുമാറ്റുക ആണ്.. പിടിച്ചാല്‍ പറയും എനിക്ക് മെയിലില്‍ കിട്ടിയതാണ്.. ആരുടെ ആണെന്ന് അറിയില്ല.. അറിഞ്ഞാല്‍ ക്രെഡിറ്റ് വെക്കാം.

ഇങ്ങനെ എന്തെല്ലാം നൂലാമാലകള്‍ ചെയ്താണ് പോസ്റ്റ്‌ ഇടുന്നത്.. ഇനി ഇട്ടാലോ കമന്റ് വരണം എന്നില്ലല്ലോ. അത്തരം ഒരു ചെറിയ ചാറ്റ് കാണാം..

ബ്ലോഗര്‍ : മാഷെ സുഖമല്ലേ..
മറ്റേ ബ്ലോഗര്‍ : അതെ സുഖം..

ബ്ലോഗര്‍ : ഞാന്‍ ഒരു പോസ്റ്റ്‌ ഇട്ടു കേട്ടോ.. ഒന്ന് വായിച്ചു കമന്റ് ഇടണം..
മറ്റേ ബ്ലോഗര്‍ : മാഷെ സമയം ഇല്ല.. അതുകൊണ്ടാ..

ബ്ലോഗര്‍..: അത് പോട്ടെ വെറുതെ ഒരു കമന്റ് ഇട്ടാല്‍ മതി.. താങ്കളുടെ കമന്റ് കണ്ടാല്‍ പിന്നെ മറ്റുള്ളവരും ഇടും.
മറ്റേ ബ്ലോഗര്‍ : തല്‍ക്കാലം ഞാന്‍ ഒരു സ്മൈലി ഇടാം.. അല്ലെങ്കില്‍ ഒരു തേങ്ങ പൊട്ടിക്കാം..

ബ്ലോഗര്‍ : നീയാര് ശ്രീയോ സ്മൈലി ഇടാന്‍.. അതോ സുല്ലോ വന്നു തേങ്ങാ അടിച്ചിട്ട് പോവാന്‍..
മറ്റേ ബ്ലോഗര്‍ : അല്ല എന്റെ കഴിഞ്ഞാ പോസ്റ്റില്‍ മാഷ് കമന്റ് ഇട്ടില്ല കേട്ടോ... അങ്ങോട്ടും ഇങ്ങോട്ടും വേണം.. ഞാന്‍ മാഷിന്റെ ബ്ലോഗ്‌ ഫോളോ ചെയ്തല്ലോ..എന്നിട്ട് എന്താ എന്റെ ബ്ലോഗില്‍ ഫോളോ ചെയ്യാത്തത്...

ബ്ലോഗര്‍ : ഞാന്‍ ഇപ്പൊ തന്നെ ഫോളോ ചെയ്യാം.. തന്റെ പഴയ പോസ്റ്റില്‍ കമന്റും ഇടാം.. വേണമെങ്കില്‍ എന്റെ ഒന്നോ രണ്ടോ അനോണി കമന്റും ഇടാം..
മറ്റേ ബ്ലോഗര്‍ : ഹഹഹഹ് .. കൊള്ളാം.. അപ്പോള്‍ ഞാനും കമന്റ് ഇടാം.. എന്റെ കൈയിലും ഉണ്ട് കൊറേ അനോണി.. അവരെയും ഇറക്കാം..

ബ്ലോഗര്‍..: ഇങ്ങനെയോക്കയല്ലേ പച്ചപിടിക്കുന്നത്.. പിന്നെ..എല്ലാവരോടും ഒന്ന് പറഞ്ഞരെ ഈ പോസ്റ്റിന്റെ കാര്യം.. അവരെല്ലാം കമന്റ് ഇടാന്‍ പറയണം. മറക്കല്ലേ..
മറ്റേ ബ്ലോഗര്‍ : അപ്പോള്‍ ശരി.. എന്റെ പോസ്റ്റും മറക്കണ്ട..കേട്ടോ..

ബ്ലോഗര്‍.. ഇല്ലെന്നെ.. പിന്നെ ലവന് ഒരു പണി കൊടുക്കാനുണ്ട്. പിന്നെ കാണാം..
മറ്റേ ബ്ലോഗര്‍..: ഓക്കേ.. സീ യൂ..

ഇത്രയും ഇരന്നു പിച്ചയെടുത്തു പോസ്റ്റ്‌ ഇട്ടു കമന്റ് വാങ്ങി അടുത്ത പോസ്റ്റ്‌ ഇടുമ്പോള്‍ അത് മറവിയുടെ ആഴക്കയത്തിലേക്ക് പോവുന്നു.. എന്തിനു ഇങ്ങനെ ചെയ്യണം...അല്ലെ..ബ്ലോഗ്‌ തുടങ്ങുക.. പോസ്റ്റ്‌ ഇടുക.. ബാക്കിയെല്ലാം താനേ വന്നുകൊള്ളും... കാശുകൊടുത്താല്‍ ഭാവന കിട്ടില്ലല്ലോ..