ബൂലോഗത്തിന്റെ കണ്ണിലുണ്ണിയും ചിലരുടെ കണ്ണില്‍ കരടുമായ കൂതറതിരുമേനിയെ കാണാനില്ല. കൂതറഅവലോകനം എന്നാ കുത്തക ബ്ലോഗിന്റെ സ്ഥാപകനായ കൂതറതിരുമേനി പള്ളിയുറക്കത്തിനു ശേഷം ഉലാത്തുവാനിറങ്ങിയതായിരുന്നു. ഈ തക്കം നോക്കി ശത്രുക്കള്‍ തിരുമേനിയെ ഒലത്തിയതാണോ എന്നും സുഹൃത്തക്കള്‍ക്ക് സംശയമുണ്ട്‌. പൊതുവേ ഭക്ഷണത്തിനു ശേഷമുള്ള ഈ ഉലത്തലായിരുന്നത്രേ തിരുമേനിയുടെ ആരോഗ്യത്തിനും അക്ഷയമായ ആശയസമ്പത്തിനും നിദാനമായിരുന്നതു. സാമാന്യമായ ഉലാത്തല്‍ സമയം കഴിഞ്ഞും തിരിചെത്താത്ത തിരുമേനിയുടെ തിരോധാനത്തെപറ്റി പോലീസ്‌ സ്റ്റെഷനില്‍ പരാതി കൊടുക്കുകയുണ്ടായി.
കാപ്പികുടിക്കുന്ന ആനയെയും ചാണത്തലയനെയും നിലയില്ലാത്തവനെയും പോലീസ്‌ ചോദ്യം ചെയ്തെന്നും ഭേദ്യം ചെയ്തെന്നും സ്ഥിരീകരിക്കാത്ത റിപ്പോര്‍ട്ടുണ്ട്. എന്തായാലും പോലീസ്‌ സ്റ്റേഷനില്‍ നിന്നും വന്ന മൂവരെയും ഏതോ തിരുമ്മു കേന്ദ്രത്തില്‍ കണ്ടതായും ചില ബ്ലോഗ്‌ വായനക്കാര്‍ പറഞ്ഞതായി അറിയാന്‍ കഴിഞ്ഞു. എന്നാല്‍ ഈ സംഭവം ബൂലോഗ പത്രമായ ബ്ലോത്രം റിപ്പോര്‍ട്ട് ചെയ്യാഞ്ഞതില്‍ അവര്‍ക്കും സംഭവുമായി അടുത്തതോ വിദൂരമായതോ ആയ ബന്ധം ഉണ്ടെന്നു സംശയിക്കേണ്ടിയിരിക്കുന്നു.
എന്തായാലും സംഭവബഹുലവും സംഘര്‍ഷഭരിതവുമായ ബൂലോഗത്ത്‌ വീണ്ടും ഭീഷണികളും ആക്രമണങ്ങളും കൊലപാതങ്ങളും ഇപ്പോള്‍ തട്ടികൊണ്ട്‌ പോകലും സജീവമായി നടക്കുമ്പോള്‍ ബൂലോഗത്ത്‌ അടിയന്തിരമായി ഒരു പോലീസ്‌ സ്റ്റേഷന്‍ എന്നാ ആവശ്യത്തിന് പ്രസക്തിയേറുന്നു. കര്‍ശനമായ പോലീസിംഗ് മാത്രമേ ഇതത്രയും പൈശാചികവും ഭീഭല്സവും നിന്ദ്യവുമായ കൃത്യങ്ങളില്‍ നിന്ന് ബ്ലോഗന്മാരെയും ബ്ലോഗിണികളെയും രക്ഷിക്കുകയുള്ളൂ. ഇത്തരം സംഭവങ്ങള്‍ തുടരുകയും ശാന്തിഭരിതമായ അന്തരീക്ഷം ഇല്ലാതിരിക്കുകയും ചെയ്‌താല്‍ ബൂലോഗത്തേയ്ക്ക് കൈകാല്‍ വയ്ക്കാന്‍ താല്പര്യം ഉള്ളവര്‍ മടിക്കുമെന്നതാവും ഫലം.
കൂതറതിരുമേനി മനുഷ്യവിദൂഷകനില്‍ നിന്ന് എന്തൊക്കെയോ മന്ത്രങ്ങള്‍ പഠിച്ചതായി കേട്ടിട്ടുണ്ട്. ഇത്തരം മന്ത്രങ്ങള്‍ ഉപയോഗിച്ച് അദ്ദേഹം രക്ഷപ്പെടുമോ ആവോ. എന്തായാലും ഇതിനെതിരെ കരിദിനമോ ആസിഡ്‌ ദിനമോ ഒക്കെ നാം ആചരിക്കണം. പാവങ്ങള്‍ക്കും ജീവിക്കേണ്ടേ. ഇന്ന് ഞാന്‍ നാളെ നീ എന്ന് പറയുന്നതുപോലെ ശക്തരില്‍ ശക്തനായ കൂതറ തിരുമേനിയെ തട്ടികൊണ്ട്‌ പോകാന്‍ കഴിയുന്ന ഗുണ്ടാസംഘം നാളെ കൃശഗാത്രരും ആരോഗ്യമില്ലത്തവരും സഹായിക്കാന്‍ ആരുമില്ലാതവരുമായ പാവം ബ്ലോഗര്‍മാരെ തട്ടികൊണ്ട്‌ പോയി പീഡിപ്പിക്കുകയോ അവരുടെ നെഞ്ചത്ത് കാളിയമര്‍ദ്ദനം ആടുകയോ ചെയ്‌താല്‍ എന്താവും ഗതി. ഇതിനൊരു അറുതി വേണ്ടേ.
മലയാളം ബ്ലോഗ്‌ നീണാള്‍ വാഴട്ടെ. ബ്ലോഗ്‌ ഐക്യവേദി നീണാള്‍ വാഴട്ടെ. ഇനി ഒരു ബ്ലോഗറെ ആരും ഉപദ്രവിക്കാതിരിക്കട്ടെ. മലയാളം ബ്ലോഗ്‌ സിന്ദാബാദ്‌.
Wednesday, June 10, 2009
Subscribe to:
Post Comments (Atom)
1 comment:
കാപ്പിലാന്‍ കൊല്ലപ്പെട്ടു, കൂതറയെ കാണ്മാനില്ല.
കാപ്പിലാനെ എപ്പോഴും കുറ്റം പറഞ്ഞു നടന്നിട്ട്, ചെറിയ മാറ്റം വരുത്തി പുതിയ ഒരു പോസ്റ്റ്‌ ആക്കി ഇവിടെ ഇട്ടു അല്ലെ . .ഗൊച്ചു ഗള്ളന്‍
Post a Comment